Acts 4
Peter mo John i mua digau hai gabunga aamua
1Di madagoaa Peter mo John e helehelekai gi nia daangada aalaa, hunu gau hai mee dabu, tagi o digau hagaloohi di Hale Daumaha, mo hunu Sadduccee ga dau mai gi baahi meemaa. 2Digaula gu boo huoloo nadau lodo i nia agoago nia daangada agoago hagau dogolua aanei bolo Jesus la gu mouli aga mai i di made, idimaa, di agoago deenei e haga modongoohia bolo digau ala ne mmade la ga mouli aga labelaa. 3Digaula ga kumi meemaa, ga kili gi lodo di hale galabudi, ga noho i golo ga dae loo gi di luada, idimaa, di madagoaa deelaa la gu hiahi. 4Gei digau dogologo ne longono nnelekai aanei, la gu hagadonu. Digaula gu dogologo mai, gu tugi di lima mana (5,000).5Dono daiaa, nia dagi o digau o Jew, nia dagi mmaadua, mo digau hagadondonu haganoho ga dagabuli i Jerusalem. 6Digaula ga dagabuli ginaadou mo di tagi aamua hai mee dabu Annas, Caiaphas, John, Alexander mo hunu ginaadou di madahaanau o di tagi aamua hai mee dabu deelaa. 7Digaula ga laha mai nia daangada agoago hagau dogolua aalaa gi nadau mua, ga heeu gi meemaa, “Di mee deenei la ne hai go goolua behee? Nia hagadilinga mogobuna behee ala i gulu baahi? Di ingoo ni ooi dela e hai hegau ai goolua?” 8Peter gu honu i di Hagataalunga Dabu, ga helekai gi digaula, “Digau nei, nia dagi o nia daangada huogodoo mo nia dagi mmaadua: 9Maa goodou e heeu mai gi gimaua dangi nei tegau humalia dela ne hai gi taane mmade ono wae, ge ne maaloo aga behee, 10malaa, goodou huogodoo mo digau Israel huogodoo, gi iloo bolo taane deenei e duu i godou mua dolomeenei la gu hili, gu humalia mai i di mogobuna o di ingoo o Jesus Christ, tangada o Nazareth dela ne daudau go goodou, gei God gu haga mouli aga a mee mai i di made. 11Deelaa go mee dela e helehelekai ai di Beebaa Dabu boloo,
Di hadu dela ne haga balumee go digau hau hale, la gu hai di hadu e kaedahi hagalabagau. a
12Di hagamouli le e gila mai hua i baahi o mee modogoia. Idimaa, deenei hua di ingoo ne wanga go God gi nia daangada huogodoo i henuailala, belee hai tangada haga mouli ni gidaadou.” 13Digau hai gabunga aamua gu goboina huoloo Peter mo John i di nau manawa maaloo, gei gu modongoohia ginaadou bolo meemaa hagalee dau, digi kae nau kuulu llauehe. Digaula gu iloo bolo meemaa nia daangada nogo heehee dalia a Jesus i mua. 14Digaula nadau helekai e hai gi meemaa ai, idimaa, digaula gu gidee taane dela gu hili dono magi, e duu madalia Peter mo John i golo. 15Digaula ga helekai gi meemaa gi ulu gi daha mo di gowaa hai gabunga aamua deelaa, ga daamada ga helehelekai i nadau mehanga, 16ga heheeu, “Gidaadou ga hai tadau aha gi nia daane dogolua aanei? Nia daangada huogodoo ala e noho i Jerusalem gu modongoohia bolo meemaa gu hai di nau mogobuna haga goboina deenei, gei gidaadou e deemee di haga de iloo di mogobuna meemaa ne hai. 17Malaa, nia mee aanei hagalee hai gi iloo digau ala i golo. Gidaadou ga hai gi meemaa bolo gu lawa, hudee helehelekai gi nia daangada di hai o di ingoo o Jesus.” 18Gei digaula ga gahigahi mai meemaa gi lodo, ga aago meemaa boloo, “Goolua hudee helehelekai labelaa be e agoago i di ingoo o Jesus.” 19Gei Peter mo John ga helekai gi digaula, “Goodou haga donu ina di mee dela e donu i mua nia hadumada o God: gimaua e hagalongo adu gi goodou, be e hagalongo gi God. 20Idimaa, gimaua hagalee lawa loo di helehelekai i mau mee ala ne mmada ginai gimaua, be ne hagalongo ginai gimaua.” 21Di buini aamua deelaa, ga hagamaaloo aga di nadau aago meemaa, ga haga maahede meemaa. Digaula digi gida di nadau hadinga humalia belee hagaduadua meemaa, idimaa, nia daangada huogodoo gu haga hagaamu a God, i di nadau gidee ginaadou nia mee ala ne hai. 22Idimaa, taane dela ne hai ginai di mogobuna deenei, gu mada haa duumaa ono ngadau.
Digau hagadonu e dalodalo bolo gi manawa maaloo
23Meemaa gu maahede, ga hula gi baahi nau ihoo, ga helekai gi digaula nia mee nia dagi hai mee dabu mo nia dagi mmaadua aalaa ne hagi ang gi ginaua. 24I di nadau longono ginaadou nia mee aanei, digaula huogodoo gu buni, gu hai dalodalo ang gi God, boloo, “Meenei Tagi, kooe ne hai di langi mo henuailala, di moana mono hagahonu huogodoo. b 25Dau Hagataalunga Dabu gu helekai mai gi gimaadou mai dau dangada hai hegau go David, go di madau damana madua, boloo,Digau tuadimee nogo hagawelewele di aha? Gei nia daangada le e aha ala e hai nadau haganoho ono hadinga ai? c
26Nia king o henuailala gu hagatogomaalia ginaadou, gei nia dagi gu dagabuli gi di gowaa e dahi belee hai baahi gi Dimaadua mo dana Mesaia.
27E donu, Herod mo Pontius Pilate, mo digau tuadimee huogodoo, mo nia daangada o Israel huogodoo, gu dagabuli mai gi lodo di waahale deenei, gu hai baahi gi Jesus, dau dangada hai hegau dabuaahia dela gu haga menege aga kooe gu hai di Mesaia. d 28Digaula gu dagabuli gi di gowaa e dahi, belee hai nia mee huogodoo ala gu lawa dau hagatau mai i mua, mai i oo mogobuna mo doo manawa. 29Meenei di madau Dagi, goe e modongoohia di huaidu dela e hai mai gi gimaadou. Dumaalia mai gi gimaadou, au gau hai hegau aanei, gi helehelekai i au agoago i di manawa maaloo. 30Holohia oo lima gi daha, gi haga hili nia magi ge gi heia nia mogobuna haga goboina huogodoo, mai i di ingoo o dau dangada hai hegau dabuaahia go Jesus.” 31I di haga lawa di nadau dalodalo, gei di gowaa dela e dagabuli iei digaula gu ngalungalua. Digaula huogodoo gu honu i di Hagataalunga Dabu, ga daamada ga agoago nia helekai a God i di manawa maaloo.
Digau hagadonu e hai mee ngaadahi gi nadau mee
32Nia manawa mo nia hagabaubau o digau huogodoo ala ne hagadonu, gu hai hua be di mee e dahi. Tangada e helekai bolo ana goloo la nia mee hua ni aana ai. Gei digaula huogodoo gu hai mee ngaadahi gi nia mee huogodoo. e 33Malaa, digau agoago hagau ga haga modomodongoohia di hai o di mouli aga o Tagi Jesus mai i nia mogobuna, gei God gu haga maluagina digaula. 34Deai tangada ne haingadaa i dahi mee ai, idimaa, digau ala e hai mee gi nia gowaa mono hale, la gu hui gi daha nia maa, gu gaamai nia bahihadu o nia goloo ala ne hui, 35ga wanga gi digau agoago hagau. Malaa, nia bahihadu aalaa, la ga duwwe ngaadahi gi taau gi di hagaloale tangada. 36Malaa, deelaa di hai a Joseph ne hai. Mee tangada Levi ne haanau i Cyprus, dela e haga ingoo go digau agoago hagau bolo Barnabas (dono hadinga bolo “Tangada Hagamaaloo aga”). 37Mee gu hui dana gowaa, gu gaamai di hui di gowaa gi digau agoago hagau.
Copyright information for
KPG